Udaberriko baratza

Nahiz eta oraindik negu betean gauden, ia hasita gaude udaberrirako barazkiak landatzen, eta segidan dituzue hauen argazki batzuk.

Lehenengo eskarola eta espinaka hauek negukoak dira, baina hemen jartzen dut, erakusteko orkatzei geroz eta gehiago gustatzen zaiela gure baratza...




Nahiz eta ganaduarentzako hari elektrikoa jarri baratzaren bueltan, orkatzak salto egin eta sartu egiten ziren barruan, eta horrela jarraitzerik ez zegoenez bi metroko sare batekin egin dugu hesia buelta guztian, eta lortu dugu berriz baratzan ez sartzea.
Lehen erabat jandako eskarolei ere buru berria ari zaie hazten...



Hemen ilarrak dauzkagu, 20 bat metroko hiru ilara.




Hemen gaur bertan ateratako argazkia (elur lapratx bat egin du goizean), ilarrei parrak eta sarea jartzen hasita. Orain orkatzentzako jarri dugun sarea berez ilarrei jartzeko erabiltzen dugu, landare igokaria delako.


Hemen baba landaretxoak, hauek ere ilaran, baina ez dute parrarik ez sarerik behar.

Baratzuriak,

Hauek ere baratzuriak dira, baina freskoan jateko. Ereiteko garaian baratzuri ale bat sartu beharrean, buru osoa sartzen da aldiko, eta horregatik hazten da landare mordoxka batera, finak eta berdetan jateko.



Tipula edo tipulina, udaberrikoa eta txuria




Eta azkenik azak, handienak negukoak dira, orain banatzen ari garenak, eta segidako txikiak udaberrikoak, maiatza inguruko otarretan izango direnak.

Neguko baratza

Baratzean argazki batzuk atera ditugu, orain banatzen ari garen barazkienak. Hemen porruak, altxaporrun ezin falta!

Hau berriz azenarioen saila da,

Borrajak,



Hau baratzaren bueltan jarrita daukagun hari elektrikoa. Normalean hari hau geure ganadua larrean dabilenean erabiltzen dugu, baina orain orkatzak (gazt: corzo) baratzean ez sartzeko gauetan jartzen dugu martxan. Batez ere azelgetan dexenteko sarraskia egin digute, eta horregatik ez degu azelgarik jarri azken otarretan.


Orkatzek jandako azelga ilararen segidan azak, brokoliak eta azaloreak,

Hemen negutegi barruko argazki batzuk, hauek datorren asteko otarrean sartuko ditugun letxugak,
beste hauek ere letxuga berdeak, hemendik bi hilabetera izango dira mozteko moduan, eta zulodun plastiko beltzean kogolloak. Plastiko hau belar txarrik ez hazteko da eta ekologian onartua dago bere erabilera. Geroz eta gutxiago erabiltzen dugu plastikoa, baina lehendik dauzkagunak berrerabiltzen ditugu. Hala ere inoiz ez dugu leku berean ipintzen jarraian, lurrari kalterik ez egiteko.

Hauek negutegi barruko azelgak, hemendik 2-3 astera hasiko gara otarretan sartzen, beti ere eguraldiaren arabera... Orkatzak negutegian behintzat ez dira sartuko eta!

Hemen eskarolak eta espinakak, negu beteko barazkiak, kanpoan.
Erremolatxa,
Rabanitoak,
Arbia ("bola de nieve" barietatea),
eta azken hau ganaduarentzako arbia da, burua gorrixkagoa eta handiagoa izaten da .

Porru eta txanpi "quiche"a

Hona hemen probatu berri dugun errezeta! Goxo-goxoa dago, gomendatzen dizuet!

Osagaiak (4 pertsonentzako):

- Porruak 4

- Txanpinoiak

- Hojaldrea

- Esne gaina

- Arraultzak 4

Asteko porrua zatitu eta egosi 15 minutuz, bitartean txanpiak laminetan sartaian egin.

Hojaldrea laberako ontzian jarri, sardexkarekin zulotxoak egin eta garbantzuak bota hojaldrea igo ez dadin. 15 min 200 gradutan.

Esne gaina eta arraultzak batidorakin nahastu, gatza eta piperbeltz piskat botaz.

Porruei ura ondo kendu eta hojaldreari gehitu txanpiekin batera, ondoren esne gain eta arraultza nahasketa bota eta labean sartu beste 30 minutuz, 190 gradutara.

Listo! Jateko prest!

On egin!

Miren

Agerrera bisita

Joan den abenduaren 3an Agerren izan ginen bisitan, eta hemen dituzue orduan ateratako argazki batzuk.








Baserriaren atzeko aldean dago ikuilua. Behiak lotu gabe daude, eta jana aurrekaldeko ilaran jartzen zaie. Erdian berriz etzateko tokiak dauzkate, lurra baino altuxeago, eta aurreraka bakarrik sartu litezke. Horrela etzateko lekuan ez dute ximaurrik egiten, eta beti garbi eta lehor daukate etzateko lekua. Lurra parrillazkoa da, eta ximaurra azpiko kanal batera erortzen da, eta hortik depositu batera doa. Ondoren, ongarri bezala erabiltzen da ximaur hau, baserriko zelaietan.








Jana egunean behin banatzen zaie, eta oinarria etxeko belarrarekin egindako siloa da. Udaberrian belar berdea jasotzen da, pilatu, ondo zapaldu eta plastikoz estaltzen da fermentatu eta negura arte kontserbatzeko. Razioa behi bakoitzeko 25 kilo silo, 5 kilo pentsu, eta alpapa eta lasto pixka batekin osatzen da. Udan larrean aritzen dira behiak, baina neguan ikuilu barruan egoten dira, zelaietan belarra oso motza delako, eta giroa bustia denean hankekin zelaiak hondatuko lituzketelako.














Behi bakoitzak txip bat dauka lepoan, eta esne asko ematen ari direnei razio extra bat ematen zaie. Atzeko aldean dagoen jantokian sartzen dira, eta sensore batek zein behi sartu den detektatzen du, eta dagokion pentsu razio extra ematen dio. Albo batean berriz rodillo berde hau daukate, behi bat rodilloaren kontra jartzen denean jiratzen hasten da, eta horrela hazka egiten dute.




























Hau egun bateko txahala da. Bigaia da eta Frisiar arrazakoa, beraz etxean haziko da, behietarako.















Ardiak ez dute zelaia hondatzen, eta belar motza hobeto aprobetxatzen dutelako, neguan larrean aritzen dira baserri ondoko zelaietan, eta uda partea berriz Irimoko magaletan pasatzen dute.
















Hau baserriaren barrualdean dago, eta behiak jeisteko tokia da. Aldiko 10 behi ilaran jartzen dira eta esnea zuzenean doa esne biltegira. Hemen esne tankeetan esnea hozten da 4 gradutara, ondoren pasteurizatu (72 gradu arte berotzen da, eta azkar hoztu berriro), eta poltsetan sartzen da azkenengo makinarekin.















Eta esnea prest dago kalean banatzeko.










Hemen daukazue Urretxu-Zumarragan Agerreko esnea izaten duten saltokien zerrenda. Inolaz ere, laster pasako dizuegu enkuestatxo bat, ea nortzuk zaudeten interesatuta esnea jasotzeko, eta eskaeraren arabera posible izango da astelehenetan banatzea, barazkiekin batera.

OTARRAK

Orain arteko otarren argazkiak dituzue hauek, azaroaren 2koa lehenengoa, eta azkena aste hontakoa, abenduaren 5ekoa, 6garren otarra.